rama
عدد المساهمات : 6
تاريخ التسجيل : 18/05/2010
 |  موضوع: سندريلا العراقية  السبت مايو 29, 2010 1:06 am | |
|
كان يامكان في عتيك الزمان ( من جان السيرفر بـ 5 دنانير ونص و من جان البعير همر و من جان الصمون ينباع فل)
جان اكو وحدة اسمها سندرلا خوش بنيه اصيلة و علمودها غنى حسام الاغنية مال العكربة.....
المهم جان عندها مرت أب كلش خبيثة و جانت تشتغل وية الامريكان مترجمة و ابوها جان خطية يبيع قوايش مبردات حجم 1100 إبـ عكد النصارى و مرات يبيع شخاط فلّ خوش إزلمة ..مال أول ...
و جانوا الكل سايكين على سندرلا خطية روحي سوي الجوزة مال مولد فصلت ...
روحي اوكفي سرة عال غاز ...
روحي السهام العبيدي اشتري شحاطات ال خواتج (الي جانو 3 خوات بس من غير أب على امهم خبيثات )..
روحي جيبي لفات فلافل ...
روحي بدلي الدهن مال المولدة الاقصى كامت أتفحّط ...
و هاي خطية جانت كلش حبااابة و تروح ولا تفتح حلكها (بس من جواها جان التقسيم مشتغل) المهم .... الى أن يوم من الايام جانت دتصعد مي بجليكان ابو ال 20 ( المي جان ضعيف و الماطور ميشتغل لان اصلا ماكو كهرباء) لكت بالطرمة فانوس بس شــــنو مزنجر و عتيك عبالك جان بوحده من دوائر الدولة و اتحوسم ..... جتي علية فركتة ....و..... جذب ... شنو كبت الدخنة سندرلا انرعصت و رجعت خطوتين ليوره من المفاجأة انهطرت بالدنكة (مع انه ما جان اكو دنكة) و كالت :هاي شنو العالم حتة هنا ايحركون زبل و تايرات؟؟؟ شنو هال دخان هذا ؟
الدخان شوية شوية اتحول الى جني لابس دريس مال برشلونة و بوتين اديداس وسوار ذهب و حاط معطر
ـــــ شبيك لبيك عبدك بين ايديك انا الجني رامي من العرصات شتريدين اسويلج بس عال سريع لأان ماما دكتلي مسكول لازم ارجع....
-عمو جني اريد وطنية 24 ساعة ممكن؟
-ولج بابة هوة اني ساحب 5 امبيرات للفانوس اشون اجيبلج وطنية 24 ساعة؟ شنو جني لو وزير الكهرباء؟
-زين عمو عمو اريد قنينة مال غاز متروسة لأن امعوزين كلش ........
- ولج عمو شنو هال لغوه ؟ ولج انتي شكد فكرية.. اكو واحد يطلب من جني قنينة مال غاز؟ شايفتني رابط الفانوس عال حصان؟
-عمو عمو لعد اشتكدر اتسويلي؟
-باعي عمو انتي بعدج اصغيرة و محرومة و الامير راح ايسوي حفلة و ادري عائلتج راح اتروح شنو رايج لو اخليج اتروحين و تتونسين؟ احتمال اتطلعين ابرنامج صاية و صرماية لأن الشرقية هم دييصورون هناك ....تره الحفلة طاكة
- زين اشون اروح عمو؟ نفرات لو كيا؟
-بابة معليج هسة غمضي عينج.... سندرلا غمضت عينها (و من الغريب يا جماعة انه اول ما غمضت عينها ما كامت اتشوف و هذا الشي محد لكالة تفسير لي هسة)و جررررب شافت سندرللا نفسها لابسة تنورة جنز كصيرة و بدي وردي و حذاء مفتوح يعني طلعت لبنانيه ....شلون ؟؟؟؟؟؟؟؟؟؟؟؟؟؟؟؟؟؟؟؟
....(الجني زرك السهام العبيدي و صرف على سريع ورقة و نص و جابلهيا ).
و كللها الحلفة اقصد الحفلة تخلص بال 8 و نص علمود منع التجول و كل هاي الهدوم راح توكع و الحذاء و الميك اب و كلشي راح يرجع و ينباع بالبسطات الي كدام سهام العبيدي اذا عبرت ال 8 و نص و احتمال تنلعسين بالطريق
-حاضر عمو شكرااااااااااااااااااااااا(هاي شكرا الطويلة مال الزعاطيط)
وصلت سندرلا لبيت الامير جان امسوي حفلة لان طلع معدل 77 بالسادس حيروح اهلية احتمال طب بيطرى؟..... بعد ما اعرف .............. و الحفلة جان بيها نجود و سمراء و ساجدة عبيد(كلة هجع و عالكة) و سهام السبتي هم جانت موجودة و الامير شاد الرباط على راسة و امقندل و صاير طلي و ردح لبو موزه و فجأة الامير صاد سندرلا و عجبتة و كابلها جتف ساعتين (بدون ميلعب بشواربه صارت قديمه) و ساندرلا نست روحها و نست الجوزة مال المولده و المي و الكهرباء والكراب و البهذلة و نزلت بزخ .. بزخ شنو قابل مي و وحيد ..... الى ان صارت 8 و نص ......اللهّّّّ!!!!! انلاصت اتذكرت وصية رامي و كالت لازم افلت ركضتلك عال سريع جنها سلبرتي توهه امجفتة و الامير وراها طراد تكول اولدز.........
-وج تعاااي شبيج اتخبلتي؟ مو دا احاجيج ؟؟؟ وين امولية ؟؟؟ فضيلة(هلكد ما سكران نسة اسمها) المهم ركضت سندرلا و.... جررب ...... وكع الحذاء بله متدري جان الامير ايشيل الحذاء و لزمة و ضل صافن على عالم الي انتبهوا على اللقطة و كاموا يباوعون علية و الامير بقة شايل الحذاء و مصدوم و صورة فضيله اببالة ... الحفلة اتوقفت طبعا و العالم سكتت من المفاجأة
..............................
جان ايباوع الامير عال العالم ....صنطة.......
.............................
زين شلون راح يلكيهه شغلة الجائزه و هالكلاوات متفيد لو بت عمته اتفوز لو تشتغل الواسطات من الاحزاب .... علمانيه و غير علمانيه؟
..............................
كلَب الحذاء بلكي يلكي علامه ..... شخط .... دبان ... يعرف منه عند يا قندرجي امصلحته ؟؟
..............................
جان يلكي ليجوه على الطركه كتابه
.............................
صعد عنه الضغط عبال غش ... لانه مسويهه بأمتحان القواعد و انلكف .
.................................
بس الكتابه سطر واحد .... ممعقوله بنظريه وحده خلصت الجواريب
.............................
لعد مو غش
............................
هناك و اشتغلت طلقات الحرس الوطني .....
............................
عباله ديلحكوهه مقاومه زارعين لغم
............................
طلع اباب الحوش ....... اشو داخ.. هاي من الشرب ....
همزين مديلحكوهه طلع مسؤول فايت
............................
رجع للبيت يريد ايفرزن شمكتوب بلكي رقم تلفون ... و يكول لنفسه (بس لا عراقنا) لا يتحصل و يكطع
..............................
من الشرب مدفرزن زين فنطاه لصديقه علمود يقراه....
..............................
اول ملزم صديقه الحذاء انزعج لانه مو على الموده
..............................
بعدين ضحك
............................
شطلع مكتوب
.............................
الشركة العامة للصناعات الجلدية: فخر الصناعة الوطنية العراقية خبرة و تميز في مجال المصنوعات الجلدية من الأحذية و الحقائب بأرقى المواد الاولية الفرع الرئيسي و الوحيد الكرادة قرب جسر ابو الطبقتين
|
| |
|
ابن البصره
نائب المدير العام
الجنس : 
 الأبراج الصينية : 
عدد المساهمات : 224
تاريخ التسجيل : 06/05/2010
العمر : 44
الموقع : العراق
| | موضوع: رد: سندريلا العراقية السبت مايو 29, 2010 3:34 am | |
| ههههههههههههههههههههه
انا صارلي ساعه اقره
عبالي الامير راح يلكى
ايميل سندريلا على الحذاء
لو رقم تلفونها
مشكووووووووووره
اختي
زعروره حلوه وعاشت ايدك
نتمنى لكي المزيد من الزعارير
تقبلي مروري
تحياتي
ابن البصره | |
|
morena
الجنس : 
عدد المساهمات : 43
تاريخ التسجيل : 11/05/2010
| | موضوع: رد: سندريلا العراقية الخميس يونيو 03, 2010 2:52 am | |
| عاشت ايدج زعرورة
القصة كولش حلوة
ونهايتها ما متوقعة
بس هذا الامير هم طلع
زعــــــــــــــــــــــرور وسندلايلا زعــــــــــروره
خيلهم ينضمون لنادي الزعرور
تحياتي الج rama
morena | |
|
